ყველა ადამიანი, რომელიც არ იცნობს ღმერთს, ღვთის წინააღმდეგია

ღვთის საქმის მიზნის, ადამიანებზე მისი საქმის სასურველი შედეგებისა და ადამიანების მიმართ მისი ზუსტი განზრახვების წვდომა არის ის, რასაც ღვთის თითოეულმა მიმდევარმა უნდა მიაღწიოს. ღვთის საქმის ცოდნა არის სწორედ ის, რაც დღეს ყველა ადამიანს აკლია. ის, თუ რა გაუკეთა ღმერთმა ადამიანებს, ღვთის მთელი საქმე და კონკრეტულად როგორი იყო ღვთის განზრახვები სამყაროს შექმნიდან დღემდე — ადამიანები ვერ სწვდებიან და ვერ აცნობიერებენ ყოველივე ამას. ეს არის ნაკლოვანება, რომელიც ვლინდება არა მხოლოდ რელიგიურ სამყაროში, არამედ კიდევ უფრო მეტად ყველა მათგანში, ვისაც ღმერთი სწამს. როდესაც დადგება დღე, როცა ჭეშმარიტად იხილავ ღმერთს, დააფასებ მის სიბრძნეს, იხილავ ყველა იმ საქმეს, რაც ღმერთმა აღასრულა და შეიცნობ იმას, რაც ღმერთს გააჩნია და მის არსებას — როდესაც იხილავ მის სიუხვეს, სიბრძნეს, საოცრებას და მთელ იმ საქმეს, რაც მან ადამიანებზე აღასრულა — მხოლოდ მაშინ იქნება შენი ღვთისადმი რწმენა ჭეშმარიტად წარმატებული. როდესაც ამბობენ, რომ ღმერთი ყოვლისმომცველი და სიუხვით სავსეა, კონკრეტულად რაში მდგომარეობს მისი ყოვლისმომცველობა და რაში გამოიხატება მისი სიუხვე? თუ ეს არ გესმის, მაშინ არ შეიძლება ჩაითვალოს, რომ ღმერთი გწამს. რატომ ვამბობ, რომ რელიგიურ სამყაროში ღვთის მორწმუნენი კი არა ბოროტმოქმედნი არიან, ეშმაკთა მსგავსნი? როდესაც ვამბობ, რომ ისინი ბოროტმოქმედნი არიან, ეს იმიტომ, რომ მათ არ ესმით ღვთის განზრახვები და არ ძალუძთ მისი სიბრძნის დანახვა. ღმერთი არასოდეს უცხადებს მათ თავის საქმეს. ისინი ყველანი ბრმები არიან და ვერ ხედავენ ღვთის საქმეებს. ისინი მიტოვებულნი არიან ღვთის მიერ და სრულიად მოკლებულნი არიან მის მზრუნველობასა და მფარველობას, რომ აღარაფერი ვთქვათ სულიწმიდის საქმეზე. ისინი, ვისაც არ გააჩნიათ ღვთის საქმე, ყველანი ბოროტმოქმედნი და ღვთის მოწინააღმდეგენი არიან. ღვთის მოწინააღმდეგე ეს ადამიანები, რომლებზეც მე ვსაუბრობ, არიან ისინი, ვინც არ იცნობს ღმერთს, ვინც სიტყვიერად აღიარებს ღმერთს, მაგრამ არავითარი ცოდნა არ გააჩნია მის შესახებ, ვინც მიჰყვება ღმერთს, თუმცა არ ემორჩილება მას, და ვინც ტკბება მისი მადლით, მაგრამ არ შეუძლია მისთვის მოწმობაში მტკიცედ დგომა. თუ ადამიანს არ ესმის ღვთის საქმის მიზანი და არ ესმის ის საქმე, რომელსაც ღმერთი ადამიანებზე აღასრულებს, იგი ვერ იქნება ღვთის განზრახვებთან შესაბამისობაში და ვერ შეძლებს ღვთისთვის მოწმობაში მტკიცედ დგომას. ადამიანების მიერ ღვთისადმი წინააღმდეგობის გაწევის მიზეზი ერთი მხრივ, მათი გახრწნილი ხასიათიდან მომდინარეობს; მეორე მხრივ კი ეს იმიტომ ხდება, რომ ისინი არ იცნობენ ღმერთს და არ ესმით ის პრინციპები, რომლებითაც იგი მოქმედებს ან ის, თუ როგორია მისი განზრახვები ადამიანების მიმართ. ეს ორი ასპექტი ერთად აღებული ქმნის ადამიანის მიერ ღვთისადმი წინააღმდეგობის გაწევის ისტორიას. ისინი, ვინც ახლახან ირწმუნეს ღმერთი, ეწინააღმდეგებიან მას, რადგან ადამიანებს აქვთ ბუნება, რომელიც ეწინააღმდეგება ღმერთს; ხოლო ისინი, ვისაც მრავალი წელია სწამთ ღმერთი, ეწინააღმდეგებიან მას იმიტომ, რომ არ იცნობენ მას და ამასთანავე გააჩნიათ გახრწნილი ხასიათი. იმ დრომდე, სანამ ღმერთი ხორცს შეისხამდა, იმის საზომი, ეწინააღმდეგებოდა თუ არა ვინმე ღმერთს, ეფუძნებოდა იმას, იცავდნენ თუ არა ისინი ზეცაში ღვთის მიერ დადგენილ განკარგულებებს. მაგალითად, რჯულის ეპოქაში, ყველა, ვინც არ იცავდა იეჰოვას რჯულს, ეწინააღმდეგებოდა ღმერთს; ყველა, ვინც იპარავდა იეჰოვას შესაწირავებს ან ეწინააღმდეგებოდა მათ, ვის მიმართაც იეჰოვა კეთილგანწყობას ავლენდა, ეწინააღმდეგებოდა ღმერთს და ჩაიქოლებოდა; ყველა, ვინც პატივს არ სცემდა მშობლებს ან სცემდა და შეურაცხყოფდა სხვა ადამიანებს, არღვევდა რჯულს, და ყველა, ვინც არ იცავდა იეჰოვას რჯულს, მისი მოწინააღმდეგე იყო. ვითარება განსხვავებული იყო მადლის ეპოქაში, სადაც ყველა, ვინც ეწინააღმდეგებოდა იესოს, ღვთის მოწინააღმდეგე იყო, და ყველა, ვინც არ ემორჩილებოდა იესოს მიერ წარმოთქმულ სიტყვებს, ღვთის მოწინააღმდეგე იყო. ამ პერიოდის განმარტება „ღვთისადმი წინააღმდეგობისა“ უფრო ზუსტი და პრაქტიკული იყო. სანამ ღმერთი ხორცს შეისხამდა, იმის საზომი, ეწინააღმდეგებოდა თუ არა ვინმე ღმერთს, ეფუძნებოდა იმას, სცემდნენ თუ არა თაყვანს და შეჰყურებდნენ თუ არა ისინი ზეცაში მყოფ უხილავ ღმერთს. იმ პერიოდის განმარტება „ღვთისადმი წინააღმდეგობისა“ არც ისე პრაქტიკული იყო, რადგან ადამიანებს არ შეეძლოთ ღვთის ხილვა და არ იცოდნენ, ზუსტად როგორი იყო ღვთის ხატი ან კონკრეტულად როგორ მოქმედებდა და საუბრობდა იგი. ადამიანებს ღვთის შესახებ არავითარი წარმოდგენა არ ჰქონდათ და ბუნდოვნად სწამდათ ღმერთი, რადგან ღმერთი ჯერ კიდევ არ გამოცხადებოდა ადამიანს. შესაბამისად, მიუხედავად იმისა, თუ როგორ სწამდათ ადამიანებს ღმერთი თავიანთ ფანტაზიებზე დაყრდნობით, ღმერთი მსჯავრს არ სდებდა მათ და არ უყენებდა ზედმეტად მაღალ მოთხოვნებს, რადგან მათ საერთოდ არ შეეძლოთ ღვთის ხილვა. როდესაც ღმერთი ხორცს ისხამს და მოდის ადამიანთა შორის სამოღვაწეოდ, ყველა ხედავს მას, ისმენს მის სიტყვებს და ხედავს ხორცშესხმული ღვთის საქმეებს, რის შემდეგაც ყველას წარმოდგენები საპნის ბუშტებივით სკდება. რაც შეეხებათ მათ, ვინც ხედავს ხორცშესხმულგამოცხადებულ ღმერთს, მათ მსჯავრი არ დაედებათ, თუკი შეგნებულად დაემორჩილებიან მას, ხოლო ისინი, ვინც მიზანმიმართულად ეწინააღმდეგებიან მას, განისაზღვრებიან, როგორც ღვთის მოწინააღმდეგე ადამიანები. ასეთი ადამიანები ანტიქრისტეები არიან, მტრები, რომლებიც შეგნებულად ეწინააღმდეგებიან ღმერთს. მათ, ვისაც ღვთის მიმართ წარმოდგენები უჩნდებათ, მაგრამ მაინც ნებაყოფლობით ემორჩილებიან მას, არ დაედებათ მსჯავრი. ღმერთი ადამიანებს მსჯავრს სდებს მათი განზრახვებისა და ქმედებების საფუძველზე და არა მათი ფიქრებისა და იდეების გამო. თუ იგი ადამიანებს მათი ფიქრებისა და იდეების საფუძველზე დასდებდა მსჯავრს, მაშინ ვერცერთი ადამიანი ვერ დააღწევდა თავს ღვთის მრისხანე ხელს. ისინი, ვინც შეგნებულად ეწინააღმდეგებიან განკაცებულ ღმერთს, დაისჯებიან თავიანთი ურჩობის გამო. ამ ადამიანების წინააღმდეგობა მომდინარეობს იმ წარმოდგენებიდან, რომლებიც მათ ღვთის მიმართ გააჩნიათ, რაც უბიძგებს მათ ისეთი ქმედებების ჩადენისკენ, რომლებიც აფერხებს და რევს ღვთის საქმეს. ყველა ასეთი ადამიანი შეგნებულად ეწინააღმდეგება და ცდილობს დაშალოს ღვთის საქმე. მათ არა მხოლოდ წარმოდგენები აქვთ ღვთის შესახებ — ისინი ასევე ერთვებიან ისეთ საქმიანობებში, რომლებიც რევს მის საქმეს და სწორედ ამ მიზეზით ედებათ მსჯავრი. ისინი, ვინც შეგნებულად არ არევენ ღვთის საქმეს, არ დაედებათ მსჯავრი, როგორც ცოდვილებს, რადგან მათ ძალუძთ, შეგნებულად დაემორჩილონ და არ ჩაიდინონ ისეთი ქმედებები, რომლებიც იწვევს ჩაშლასა და არეულობას. ასეთ ადამიანებს მსჯავრი არ დაედებათ. თუმცა, როდესაც ადამიანს მრავალი წლის განმავლობაში აქვს გამოცდილი ღვთის საქმე, მაგრამ კვლავაც გააჩნია წარმოდგენები მის შესახებ და არ ძალუძს ხორცშესხმული ღვთის საქმის შეცნობა, როდესაც ადამიანი კვლავაც სავსეა ამ წარმოდგენებით და ვერ შეიცნობს მას მიუხედავად იმისა, თუ რამდენი წელია, რაც მის საქმეს გამოცდიდა, და მისი გული კვლავაც აღსავსეა ღვთის შესახებ ამგვარი შეხედულებებით მიუხედავად იმისა, რომ მას აუცილებლად არ ჩაუდენია ისეთი რამ, რაც არეულობას იწვევს — და, თუმცა ეს წარმოდგენები შესაძლოა არ იყოს აშკარა, ეს ადამიანი არავითარ სარგებელს არ მოუტანს ღვთის საქმეს, არ შეუძლია ღვთის სახარების ქადაგება ან მისი მოწმობის მტკიცედ დაცვა — ეს ნიშნავს, რომ ის უვარგისი და უგუნურია. რადგან ისინი არ იცნობენ ღმერთს და, უფრო მეტიც, სრულიად არ ძალუძთ უარი თქვან მის შესახებ თავიანთ წარმოდგენებზე, მათ მსჯავრი ედებათ. ეს შეიძლება ასე ითქვას: ნორმალურია, რომ მათ, ვინც ახლახან ირწმუნა ღმერთი, ჰქონდეთ წარმოდგენები მის შესახებ ან არ იცნობდნენ მას, მაგრამ თუ ადამიანს მრავალი წელია სწამს ღმერთი და გამოცდილი აქვს მისი საქმის დიდი ნაწილი და მაინც გააჩნია წარმოდგენები მის შესახებ, ეს არ არის ნორმალური; კიდევ უფრო არანორმალურია, თუ მათ არავითარი ცოდნა არ აქვთ ღვთის შესახებ. რადგან ეს არ არის ნორმალური მდგომარეობა, მათ მსჯავრი ედებათ. ეს არანორმალური ადამიანები ყველანი უსარგებლონი არიან; სწორედ ისინი ეწინააღმდეგებიან ღმერთს ყველაზე მეტად და ამაოდ დატკბნენ ღვთის მადლით. ყველა ასეთი ადამიანი საბოლოოდ მოიკვეთება!

ისინი, ვისაც არ ესმით ღვთის საქმის მიზანი, ღვთის მოწინააღმდეგენი არიან. ისინი, ვისაც ესმით ღვთის საქმის მიზანი, მაგრამ არ ესწრაფვიან მის დაკმაყოფილებას, კიდევ უფრო მეტად არიან ღვთის მოწინააღმდეგენი. ისინი, ვინც დიდებულ ეკლესიებში ბიბლიას კითხულობენ, მთელი დღე ზეპირად იმეორებენ ბიბლიას, მაგრამ არცერთ მათგანს არ ესმის ღვთის საქმის მიზანი, არცერთ მათგანს არ შეუძლია ღვთის შეცნობა და მით უმეტეს, არცერთ მათგანს არ შეუძლია ღვთის განზრახვებთან შესაბამისობაში ყოფნა. ისინი ყველანი უსარგებლო, საზიზღარი ადამიანები არიან; ისინი ყველანი ის ადამიანები არიან, რომლებიც ამაღლებულ ადგილას დგანან, რათა „ღმერთი“ დამოძღვრონ; ისინი ყველანი ის ადამიანები არიან, რომლებიც ღვთის დროშის ქვეშ მოქმედებენ, მაგრამ შეგნებულად ეწინააღმდეგებიან ღმერთს; და ისინი ყველანი ის ადამიანები არიან, რომლებიც ღვთისადმი რწმენის იარლიყს ატარებენ, მაგრამ ადამიანის ხორცს ჭამენ და ადამიანის სისხლს სვამენ. ასეთი ადამიანები ყველანი ბოროტი ეშმაკები არიან, რომლებიც შთანთქავენ ადამიანის სულს; ყველანი მთავარი დემონები არიან, რომლებიც შეგნებულად უბნევენ გზას ადამიანებს, რათა არ დაადგნენ სწორ გზას; და ყველანი დაბრკოლების ლოდები არიან, რომლებიც აფერხებენ ადამიანებს ღვთის ძიებაში. მიუხედავად იმისა, რომ ისინი ყველანი „ფიზიკურად ძლიერნი“ არიან, საიდან უნდა იცოდნენ მათმა მიმდევრებმა, რომ ისინი სინამდვილეში ანტიქრისტეები არიან, რომლებსაც ადამიანები ღვთისადმი წინააღმდეგობისკენ მიჰყავთ? საიდან უნდა იცოდნენ მათმა მიმდევრებმა, რომ ისინი სინამდვილეში ცოცხალი ეშმაკები არიან, რომლებიც ადამიანის სულის შთანთქმას ესწრაფვიან? ისინი, ვინც საკუთარ თავს ღვთის წინაშე კეთილშობილად მიიჩნევენ, ყველაზე მდაბიონი არიან, ხოლო ისინი, ვინც საკუთარ თავს მდაბიოდ მიიჩნევენ, ყველაზე კეთილშობილნი არიან. ხოლო ისინი, ვინც კადნიერდებიან და აცხადებენ, რომ იცნობენ ღვთის საქმეს, და შეუძლიათ მისი საქმის შესახებ სხვებს შეუზღუდავად აუწყონ, ყველაზე უმეცარნი არიან. ასეთ ადამიანებს არ გააჩნიათ მოწმობა ღვთისთვის და ყველა მათგანი ამპარტავანი და ქედმაღალია. ისინი, ვისაც სჯერათ, რომ ძალიან ცოტა იციან ღვთის შესახებ, მაგრამ სინამდვილეში აქვთ პრაქტიკული გამოცდილება და ცოდნა ღვთის შესახებ, ყველაზე მეტად უყვარს მას. მხოლოდ ასეთ ადამიანებს ჭეშმარიტად აქვთ მოწმობა და ჭეშმარიტად ძალუძთ, რომ ღმერთმა სრულქმნილნი გახადოს. ისინი, ვისაც არ ესმით ღვთის განზრახვები, ღვთის მოწინააღმდეგენი არიან. ისინი, ვისაც ესმით ღვთის განზრახვები, მაგრამ არ იყენებენ ჭეშმარიტებას პრაქტიკაში, ღვთის მოწინააღმდეგენი არიან. ისინი, ვინც ჭამენ და სვამენ ღვთის სიტყვებს, და მაინც ეწინააღმდეგებიან ღვთის სიტყვების არსს, ღვთის მოწინააღმდეგენი არიან. ისინი, ვისაც გააჩნიათ წარმოდგენები ხორცშესხმული ღვთის შესახებ და, უფრო მეტიც, შეგნებულად ერთვებიან ამბოხებაში, ღვთის მოწინააღმდეგენი არიან. ისინი, ვინც განიკითხავენ ღმერთს, ღვთის მოწინააღმდეგენი არიან. და ყველა, ვისაც არ ძალუძს ღვთის შეცნობა და მისთვის მოწმობის გაცემა, ღვთის მოწინააღმდეგეა. ამიტომ, მე მოგიწოდებთ თქვენ: თუ ნამდვილად გაქვთ რწმენა, რომ იაროთ ამ გზაზე, მაშინ განაგრძეთ მიყოლა. მაგრამ თუ არ შეგიძლიათ თავი შეიკავოთ ღვთის მიმართ წინააღმდეგობისგან, მაშინ უმჯობესია განზე გადგეთ, სანამ გვიან არ არის, თორემ საქმე ნამდვილად კარგად არ წაგივათ, რადგან თქვენი ბუნება უბრალოდ მეტისმეტად გახრწნილია. თქვენ მოკლებულნი ხართ ერთგულებას, მორჩილებას, გულს, რომელსაც სამართლიანობა და ჭეშმარიტება სწყურია, და ღვთისადმი სიყვარულს. შეიძლება ითქვას, რომ თქვენი მდგომარეობა ღვთის წინაშე არსებითად სრული ქაოსია. არ ძალგიძთ დაიცვათ ის, რაც უნდა დაიცვათ, თქვათ ის, რაც უნდა თქვათ, პრაქტიკაში გამოიყენოთ ის, რაც უნდა გამოიყენოთ და შეასრულოთ ის ფუნქცია, რომელიც უნდა შეასრულოთ; არ გაქვთ ის ერთგულება, რომელიც უნდა გქონდეთ, ის სინდისი, რომელიც უნდა გქონდეთ, ის მორჩილება, რომელიც უნდა გქონდეთ, ან ის ურყევი ნება, რომელიც უნდა გქონდეთ; არ გამოგიცდიათ ის ტანჯვა, რომელიც უნდა გამოგეცადათ, და არც ის რწმენა გაქვთ, რომელიც უნდა გქონდეთ. თითქმის სრულიად მოკლებულნი ხართ ყოველგვარ ღირსებას. განა არ გრცხვენიათ, რომ აგრძელებთ ცხოვრებას? გირჩევთ, რომ რაც შეიძლება მალე დახუჭოთ თვალები და მარადიულად განისვენოთ, რითაც იხსნით ღმერთს თქვენ გამო წუხილისა და ტანჯვისგან. გწამთ ღმერთი და მაინც არ გესმით მისი განზრახვები; ჭამთ და სვამთ ღვთის სიტყვებს და მაინც არ ძალგიძთ დააკმაყოფილოთ ღვთის მოთხოვნები ადამიანის მიმართ. გწამთ ღმერთი და მაინც არ იცნობთ მას და ცხოვრობთ მისწრაფების მიზნის გარეშე, ყოველგვარი ღირებულებებისა თუ რაიმე აზრის გარეშე. ადამიანები ხართ და მაინც ოდნავადაც არ გაგაჩნიათ სინდისი, ზნეობა ან სანდოობა — განა კიდევ შეგიძლიათ საკუთარ თავს ადამიანები უწოდოთ? გწამთ ღმერთი და მაინც ატყუებთ მას; ღვთის ფულსაც კი ხარბად ესწრაფვით და ჭამთ მისთვის მიძღვნილ შესაწირავებს. და მაინც, საბოლოოდ, ოდნავადაც ვერ ითვალისწინებთ ღვთის გრძნობებს და მცირედ სინდისსაც კი არ ავლენთ მის მიმართ. ღვთის მიერ დადგენილი ერთი მცირე მოთხოვნის დაკმაყოფილებაც კი არ ძალგიძთ. განა კიდევ შეგიძლიათ საკუთარ თავს ადამიანები უწოდოთ? ჭამთ ღვთის მიერ მოცემულ საკვებს, სუნთქავთ მის მიერ ბოძებულ ჟანგბადს და ტკბებით მისი მადლით, მაგრამ საბოლოოდ მცირედი ცოდნაც კი არ გაგაჩნიათ ღვთის შესახებ. პირიქით, ღვთის მოწინააღმდეგე უსარგებლო ადამიანებად იქეცით. განა ეს არ გაქცევთ მხეცად, რომელიც ძაღლსაც კი ვერ შეედრება? ცხოველთა შორის, მოიძებნება კი რომელიმე, რომელიც თქვენზე უფრო ბოროტგანზრახულია?

ის პასტორები და უხუცესები, რომლებიც მაღლიდან მოძღვრავენ სხვებს, ღვთის მოწინააღმდეგენი არიან; ისინი ყველანი სატანის მოკავშირეები არიან. რაც შეგეხებათ თქვენ, ვინც სხვებს მოძღვრავთ, თუმცა მაღლიდან არ მოძღვრავთ, განა კიდევ უფრო მეტად არ ეწინააღმდეგებით ღმერთს? განა კიდევ უფრო მეტად არ ხართ სატანასთან შეკრულნი? მათ, ვისაც არ ესმით ღვთის საქმის მიზანი, არ იციან, როგორ იყვნენ ღვთის განზრახვებთან შესაბამისობაში. შეიძლება თუ არა იგივე ითქვას მათზე, ვისაც ესმის მისი საქმის მიზანი? ღვთის საქმე არასოდეს არის მცდარი; პირიქით, პრობლემა ადამიანთა სწრაფვაშია. განა ის გადაგვარებული ადამიანები, რომლებიც შეგნებულად ეწინააღმდეგებიან ღმერთს, კიდევ უფრო მზაკვარნი და ბოროტგანზრახულნი არ არიან, ვიდრე ის პასტორები და უხუცესები? მრავალნი არიან ისინი, ვინც ეწინააღმდეგება ღმერთს, მაგრამ მათ შორის მრავალგვარია ის მდგომარეობებიც, რომლებშიც ისინი ღმერთს ეწინააღმდეგებიან. როგორც არსებობენ ყოველგვარი მორწმუნენი, ასევე არსებობენ ყოველგვარი ღვთის მოწინააღმდეგენი და თითოეული მათგანი განსხვავდება ერთმანეთისგან. ვერცერთი მათგანი, ვინც ვერ ახერხებს ნათლად შეიცნოს ღვთის საქმის მიზანი, ვერ გადარჩება. მიუხედავად იმისა, თუ როგორ ეწინააღმდეგებოდა ადამიანი ღმერთს წარსულში, როდესაც იგი გაიგებს ღვთის საქმის მიზანს და შეძლებს ძალისხმევა გამოიჩინოს ღვთის დასაკმაყოფილებლად, ღმერთი წაშლის მის ყველა წინანდელ ცოდვას. თუკი ადამიანს ძალუძს ეძიოს და პრაქტიკაში გამოიყენოს ჭეშმარიტება, ღმერთი არ დაიმახსოვრებს ყველაფერს, რაც მას ჩაუდენია. უფრო მეტიც, ღმერთი დაახასიათებს მას, როგორც მართალ ადამიანს, რადგან მას შეუძლია ჭეშმარიტების პრაქტიკაში გამოყენება. ეს არის ღვთის სამართლიანობა. სანამ ადამიანი იხილავს ღმერთს ან გამოსცდის მის საქმეს, მიუხედავად იმისა, თუ როგორ ეპყრობოდა იგი ღმერთს, ის ამას არ იმახსოვრებს. თუმცა, მას შემდეგ, რაც ადამიანი იხილავს ღმერთს და გამოსცდის მის საქმეს, მის ყველა საქმესა და ქმედებას ღმერთი შეიტანს „მატიანეში“, რადგან მან იხილა ღმერთი და ცხოვრობდა მისი საქმეთა შორის.

როდესაც ადამიანი ჭეშმარიტად იხილავს იმას, რაც ღმერთს გააჩნია და მის არსებას, იხილავს ღვთის უზენაესობას და ჭეშმარიტად შეიცნობს ღვთის საქმეს — და, უფრო მეტიც, როდესაც მისი ძველი ხასიათი შეიცვლება — იგი სრულად მოიშორებს თავის ამბოხებულ ხასიათს, რომელიც ეწინააღმდეგება ღმერთს. ეს შეიძლება ასე ითქვას: ყველას გაუწევია წინააღმდეგობა ღვთისთვის და ყველა ამბოხებულა ღვთის წინააღმდეგ. თუმცა, თუ შეგიძლია შეგნებულად დაემორჩილო ხორცშესხმულ ღმერთს და ამიერიდან დააკმაყოფილო ღვთის გული შენი ერთგულებით, პრაქტიკაში გამოიყენო ის ჭეშმარიტება, რომელიც პრაქტიკაში უნდა გამოიყენო, შეასრულო ის მოვალეობა, რომელიც უნდა შეასრულო, და დაიცვა ის წესები, რომლებიც უნდა დაიცვა მაშინ შენ ხარ ის, ვისაც სურს მოიშოროს თავისი ურჩობა ღვთის დასაკმაყოფილებლად და ის, ვისი სრულყოფაც ღმერთს ძალუძს. თუ ჯიუტად აგრძელებ შენს მცდარ გზას გულში სინანულის გარეშე, და განაგრძობ შენს ამბოხებულ ქცევას ღმერთთან თანამშრომლობისა და მისი დაკმაყოფილების მცირედი განზრახვის გარეშეც კი, მაშინ შენნაირი ჯიუტი და გამოუსწორებელი ადამიანი მონიშნული იქნება დასასჯელად და განისაზღვრება, როგორც ის, ვინც არ იქნება ღვთის მიერ სრულყოფილი. თუ ეს ასე მოხდება, იქნები ღვთის მტერი დღეს, ხვალა და ზეგაც — სამუდამოდ იქნები ღვთის მოწინააღმდეგე, ღვთის მტერი. მაშინ როგორღა დაგინდობს ღმერთი? ადამიანებს აქვთ ბუნება, რომელიც ეწინააღმდეგება ღმერთს, მაგრამ მათ შეგნებულად არ უნდა ეძიონ ღვთისადმი წინააღმდეგობის გაწევის „საიდუმლო“, რადგან ადამიანის ბუნების შეცვლა ძალიან რთულია. თუ ამას შეეცდები, უმჯობესია უბრალოდ განზე გადგე, სანამ გვიან არ არის, რათა შენი გაკიცხვა მომავალში უფრო მკაცრი არ გახდეს, რათა შენმა მხეცურმა ბუნებამ არ იფეთქოს და უმართავი არ გახდეს და შენი ხორციელი სხეული საბოლოოდ არ განადგურდეს ღვთის მიერ. ღმერთი კურთხევის მისაღებად გწამს; მაგრამ თუ საბოლოოდ ამის ნაცვლად უბედურებას მოიმკი, შენი რწმენა ნამდვილად არ ყოფილა ამად ღირებული. მოგიწოდებთ, აჯობებს სხვა გეგმა შეიმუშაოთ. განა არ აჯობებდა, ღვთის რწმენის გარდა ნებისმიერი სხვა რამ გეკეთებინათ? ნამდვილად გჯერათ, რომ ეს ერთადერთი გზაა თქვენთვის? განა არ გააგრძელებდით არსებობას ჭეშმარიტების ძიების გარეშეც? რატომ უპირისპირდებით ღმერთს ასე?

წინა: ადამიანის ბუნების უცვლელობა ღმერთთან მტრობას ნიშნავს

შემდეგი: საქმე და შესვლა (1)

პარამეტრები

  • ტექსტი
  • თემები

სადა ფერები

თემები

შრიფტები

შრიფტის ზომა

სტრიქონებს შორის მანძილი

გვერდის სიგანე

სარჩევი

ძიება

  • ტექსტში ძიება
  • წიგნში ძიება